Гэвкамен 25 гр, мазь
Тауарлардың көрінісі фотосуретте көрсетілгеннен өзгеше болуы мүмкін

Гэвкамен 25 гр, мазь

Қолжетімділігі
Тауар қолда жоқ
Үлгі
4810201004686
Елі
Беларусь
Өндіруші
Борисовский завод медицин
  • Сипаттама

Сипаттама

Дәрілік затты медициналық қолдану жөніндегі нұсқаулық

ГЭВКАМЕН

Саудалық атауы

Гэвкамен

Халықаралық патенттелмеген атауы

Жоқ

Дәрілік түрі

Cыртқа қолдануға арналған жақпамай 25 г

Құрамы

Бір сықпаның ішінде

белсенді заттар:

левоментол4.5 г

рацемиялық камфора2.5 г

эвкалипт майы2.5 г

қалампыр майы 0.25 г

қосымша заттар: қатты мұнай парафині, жұмсақ ақ парафин.

Сипаттамасы

Ақ немесе сарғыш реңді ақ түсті, өзіне тән исі бар жақпамай

Фармакотерапиялық тобы

Сүйек-бұлшықет жүйесі. Буын және бұлшықет ауыруы кезінде жергілікті қолдануға арналған препараттар. Басқалар.

АТХ коды M02AX10

Фармакологиялық қасиеттері

Фармакокинетикасы

Зақымданбаған теріге окклюзиялық таңғыш астына жаққаннан кейін орташа алғанда 0,2-2,8 мм/сағат жылдамдықпен сіңеді. Жүйелі сіңуі 0,1%-дан төмен.

Сіңуге ұшыраған жақпамайдың терпендік компоненттерінің бөлігі одан әрі қарай гидрокси-туындыларын түзе отырып бауыр цитохромдары жүйесімен тотықтанады, одан кейін олар глюкурон қышқылымен конъюгирленеді және несеппен (41,1-47,7%) және шырыш бездері сөліністерімен бөлініп шығады.

Жақпамайдың барлық дозасының 0,014% азы өзгермеген түрде бөлініп шығады.

Фармакодинамикасы

Гэвкамен жақпамайы – өсімдік тектес біріктірілген препарат, жергілікті тітіркендіргіш және «аулақтатқыш», әлсіз қабынуға қарсы әсер етеді.

Гэвкаменнің әсер ету механизмі жақпамайдың құрамына енетін эфир майларының және терпен туындыларының (камфора мен ментолдың) шамасына байланысты. Қалампыр майының негізгі әсер етуші компоненттері эвгенол (60-95%), оның сірке эфирі(2-27%) кариофиллендер (5-10%) болып табылады. Эвкалипт майының негізгі әсер ететін компоненттері 1,8-цинеол (54-95%), пинен (2,6%), терпинеол (2,7%) болып табылады. Терпендік туындылар тітіркендіруші әсер ете отырып, жанасу аймағындағы суықтық және ауыру рецепторларын көтермелейді. 3,3-16,4 мкг/мл концентрацияларындағы Эвгенол және эвкалипттің эфир майларының 5,8 мкг/млконцентрациясындағы компоненттері I және II типті циклооксигеназаның, сондай-ақ липоксигеназаның белсенділігін бәсеңдетеді. Нәтижесінде эйкозаноидтер синтезінің арахидондық каскадының реакциялары бөгеледі және қабыну ошағындапростагландиндердің, тромбоксан мен лейкотриеннің түзілуі бұзылады. Жақпамайды жаққаннан кейін күйдіріп-ашыту, дәріні жаққан жердегі гиперемия мен ісіну түріндегі оның тітіркендіргіш әсері бірден байқалады.

Қолданылуы

Невралгияда, миалгияда, артралгияда аулақтатқыш және ауыруды басатын дәрі ретінде.

Қолдану тәсілі және дозалары

Препарат сыртқа қолдануға арналған. Жақпамайды буындар аймағындағы зақымданған жерлерге немесебұлшықеттергекүніне 2 - 3 рет 2 - 4 грамнан (ұзындығы 2 - 4 см жақпамай жолақтарына сәйкес келеді), жақпамай жағылған жерлерді аздап сылай отырып, жұқалап жағады. Емдеу курсының ұзақтығы 3-5 күнді құрайды, қажет болғанда курстарды 2-3 күн аралығымен қайталайды, ол аурудың ауырлығы мен ағымына және қосымша емнің сипатына байланысты. Препаратты қолданғаннан кейін мұқият қолды жуып тастау қажет. Жақпамайдың көзге және шырышты қабаттарға тиіп кетуінен сақ болу керек.

Жағымсыз әсерлері

Жүйке жүйесі тарапынан: жақпамайды зақымданған теріге жаққанда оның сіңуі және бас ауыруы, атаксия, бағдарсыздық – ауыр жағдайларда, сананың шатасуы, әлсіздік дамуы мүмкін.

Тері жабындары мен тері асты-майлы шелдері тарапынан: перианальді қышыну, терінің тітіркенуі, жақпамай жаққан жердегі экзема.

Ас қорыту жүйесі тарапынан: жақпамайды ішке кездейсоқ қолданған кезде – іштің ауыруы, жүрек айнуы, құсу.

Жүрек-қантамыр жүйесі тарапынан: жақпамайды зақымданған теріге жаққанда оның сіңуі және жүрек қағуының дамуы, брадикардия, жүрек ырғағының бұзылуы мүмкін.

Аллергиялық реакциялар: терінің тітіркенуі, эритема, бөртпе, қабыршықтану, қышыну, тері түсінің өзгеруі, есекжем, жанаспалы дерматит, бронх түйілу реакциялары.

Құрамында камфора болуына байланысты бас ауыру, бас айналу, құрысулар болуы мүмкін.

Жағымсыз реакциялар, оның ішінде осы нұсқаулықта көрсетілмегендері пайда болған жағдайда, жақпамай қолдануды тоқтатып, дәрігерге қаралу қажет.

Қолдануға болмайтын жағдайлар

- жалбыздың, қалампыр ағашының, эвкалипттің эфир майларына, мирт тұқымдастары өсімдіктеріне жоғары сезімталдық.

- тері беткейі бүтіндігінің бұзылуы

- 18 жасқа дейінгі балаларға

- дәрілік затты жаққан бөліктерде тері ауруларының (пиодермия, дерматит, экзема) болуы

- анамнездегі эпилепсия, құрысулар (оның ішінде фебрильді), бронх түйілуіне бейімділік, бронх демікпесі, көкжөтел

- жүктілік және лактация кезеңі

Дәрілермен өзара әрекеттесуі

Гэвкамен жақпамайының жүйелі сіңуінің төмен болуымен байланысты дәрілік өзара әрекеттесудің даму қаупі жоғары емес.

Дегенмен препараттың құрамына енетін терпендік компоненттер басқа дәрілік заттарды метаболиздейтін бауырдың микросомальді ферменттерінің индукторлары болып табылатынын ұмытпау керек. Сондықтан Гэвкаменмен бірге қолданылатын басқа дәрілік заттар тиімділігінің әлсіреу ықтималдығы болуы мүмкін.

Жергілікті қолдануға арналған қабынуға қарсы стероидты емес дәрілермен бір мезгілде қолданған кезде олардың тиімділігі мен жаққан жердегі жұмсақ тіндерге ену тереңдігін арттырады. Диметилсульфоксидті Гэвкамен жақпамайымен бір мезгілде жаққан кезде оның құрамына енетін эфир майлары компоненттерінің жүйелі сіңуін күшейтеді және жаққан жердегі жұмсақ тіндерге ену тереңдігін арттырады.

Айрықша нұсқаулар

Жақпамайдың көзге және шырышты қабаттарға тиіп кетуінен сақ болу керек.

Жақпамайды зақымданған теріге жағуға болмайды. Терінің қатты тітіркенуінде жағуға болмайды.

Жүктілік және лактация кезеңі

Гэвкамен жақпамайын жүктілік пен лактация кезеңінде қолдану ана үшін пайда мен бала/ұрық үшін қауіпті мұқиятбағалаудан кейін ғана мүмкін болады.

Дәрілік заттың көлік құралдарын жүргізу немесе қауіптілігі зор механизмдерді басқару қабілетіне әсер ету ерекшеліктері

Әсер етпейді.

Артық дозалануы

Препаратты дұрыс қолданғанда артық дозалануы ықтималдығы аз, бұл оның жүйелі сіңуінің төмендігімен байланысты. Жақпамайды байқамай жұтып қойғанда симптомдары: қыжыл, іштің ауыруы, жүрек айнуы, құсу, бас айналуы, брадикардия, АҚ төмендеуі, бағдардан жаңылу, сананың шатасуы, бұлшықет әлсіздігі, миоз, құрысулар.

Емі: асқазанды шаю, энтеросорбенттерді қабылдау, демеуші және симптоматикалық ем. Арнайы антидоты жоқ.

Шығарылу түрі және қаптамасы

25 г алюминий сықпаларда. Әрбір сықпа медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынады.

Сақтау шарттары

25ºС-ден аспайтынтемпературада cақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецептісіз

Өндіруші

«Борисов медициналық препараттар зауыты» ашық акционерлік қоғамы,

Беларусь Республикасы, Минск обл., Борисов қ., Чапаев көшесі, 64 тел/факс 8-(10375177)744280.

Тіркеу куәлігінің ұстаушысы

«Борисов медициналық препараттар зауыты» ашық акционерлік қоғамы, Беларусь Республикасы

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электрондық пошта)

Қазақстан Республикасы, 050026. Алматы қ., Нұрмақов к-сі 26/195, 39 пәтер, «МедФарм» ЖК, тел/факс: +7 (727) 2911 198, тел: +7 777 7040709, +7 777 2306494;

Е-mail: pvqa-bzmp-kz@mail.ru