Біздің компаниямыз жайлы жалпы ақпарат.
Дәрілік препаратты медициналық қолдану жөніндегі нұсқаулық
Саудалық атауы
L-Тироксин 50 Берлин-Хеми
Халықаралық патенттелмеген атауы
Натрий левотироксині
Дәрілік түрі, дозасы
50 мкг таблеткалар
Фармакотерапиялық тобы
Жүйелі қолданылатын гормональді препараттар, жыныстық гормондар мен инсулиндерді қоспағанда. Қалқанша без ауруларын емдеуге арналған препараттар. Қалқанша без гормондары. Левотироксин.
АТХ коды H03AA01
Қолданылуы
- кез келген этиологиядағы гипотиреозда тиреоидты гормондардың орнын басу үшін
- эутиреоидты зобты алып тастағаннан кейін зобтың қайталануының алдын алуда
- эутиреоидты қатерсіз зобта
- эутиреоз жағдайына қол жеткізгеннен кейін гипертиреозды тиреостатик-термен емдеу аясында адъювантты емде
- қалқанша бездің қатерлі жаңа түзілімінде супрессивті және орын басу емі, негізінен - тиреоидэктомиядан кейін
L-Тироксин 50 Берлин-Хеми пациенттердің барлық жас топтарында қолдануға арналған.
Қолдануды бастағанға дейін қажетті мәліметтер тізбесі
Қолдануға болмайтын жағдайлар
- әсер етуші затына немесе құрамында аталған қосымша заттарының кез келгеніне жоғары сезімталдық
- емделмеген гипертиреоз
- бүйрек үсті безінің емделмеген жеткіліксіздігі
- емделмеген гипофизарлық жеткіліксіздік (бұл емдеуді қажет ететін бүйрек үсті безі функциясының жеткіліксіздігіне әкеледі)
- жедел миокард инфарктісі
- жедел миокардит
- жедел панкардит
Жүктілік кезінде левотироксинді тиреостатикалық дәрілермен бір мезгілде қабылдауға болмайды.
Қолданған кездегі қажетті сақтандыру шаралары
Тиреоидты гормондармен емді бастамас бұрын келесі аурулар немесе жағдайлар жоққа шығарылуы немесе оларға ем жүргізілуі керек:
- жүректің ишемиялық ауруы
- стенокардия
- гипертония
- гипофизарлық жеткіліксіздік және/немесе бүйрек үсті безі қыртысының жеткіліксіздігі
- қалқанша бездің автономиясы.
Бүйрек үсті бездерінің дисфункциясы жағдайында левотироксинмен емдеуді бастамас бұрын, бүйрек үсті безінің жедел жеткіліксіздігінің алдын алу үшін адекватты ауыстыру терапиясымен емделу керек.
Жүректің ишемиялық ауруында, жүрек жеткіліксіздігінде, тахиаритмияда, өршу фазасындағы емес миокардитте, созылмалы гипотиреозда немесе миокард инфарктісін өткерген пациенттерде тіпті жеңіл дәрежедегі фармакологиялық индукцияланған гипертиреоздан міндетті түрде сақ болу керек. Тиреоидты гормондармен ем жүргізгенде осы пациенттердің қалқанша без гормондарының көрсеткіштеріне жиі бақылау жүргізу керек.
Екіншілік гипотиреозда қатар жүретін адренокортикальді жеткіліксіздіктің бар-жоғын анықтау керек. Осы аурудың барында алдымен орын басатын емді жүргізу керек (гидрокортизон). Организмді кортикостероидтармен тиісінше қамтамасыз етусіз тиреоидты гормондармен емдеу адренокортикальді немесе гипофизарлық жеткіліксіздігі бар пациенттерде адиссондық криз тудыруы мүмкін.
Бүйрек үсті бездерінің функциясы жетілмегендіктен және болуы мүмкін коллапстан - туған кезде дене салмағы өте төмен шала туған балаларда левотироксинмен емнің басында ерекше сақтық таныту керек.
Анамнезінде эпилепсиямен ауыратын науқастарға левотироксинді тағайындағанда сақ болу керек, өйткені бұл науқастарда ұстамалар қаупі жоғары.
Қалқанша бездің автономиясына күдік туындағанда тиреотропин-рилизинг-гормонға талдау немесе оның супрессиясымен қалқанша бездің сцинтиграфиясын жүргізу ұсынылады.
Басқа дәрілік препараттармен өзара әрекеттесуі
Диабетке қарсы дәрілер
Левотироксин қандағы глюкоза деңгейін төмендетумен сипатталатын диабетке қарсы препараттардың (мысалы, метформин, глимепирид, глибенкламид және инсулин) әсерін әлсіретуі мүмкін. Сондықтан қант диабетінен зардап шегетін тұлғаларда, негізінен, тиреоидты гормондармен емнің басында және соңында қандағы глюкоза деңгейін үнемі тексеру керек. Қажет болғанда қантты төмендететін дәрілік заттардың дозасын түзету керек.
Кумарин туындылары
Левотироксин оларды плазма ақуыздарымен байланысқан жерлерінен ығыстырып, кумарин туындыларының әсерін күшейтуі мүмкін. Осы себепті левотироксин мен кумарин туындыларын бір мезгілде қабылдайтын тұлғаларда, үнемі қанның ұюын тексеру, және қажет болған жағдайда антикоагулянттың дозасын түзету (дозаны азайту) керек.
Йоналмастырғыш шайырлар
Колестирамин, колестипол немесе полистиренді сульфон қышқылының кальций және натрий тұзы секілді йоналмастырғыш шайырлар асқазан-ішек жолында тиреоидты гормондарды байланыстыру жолымен левотироксиннің сіңуін басады; сондықтан оларды L-Тироксин 50 Берлин-Хеми қабылдағаннан кейін 4-5 сағаттан соң қабылдау керек.
Өт қышқылын байланыстыратын дәрілер
Колесевелам левотироксинді байланыстырады және осылайша асқазан-ішек жолында левотироксиннің сіңуін төмендетеді. Левотироксинді колесевелам қабылдауға дейін 4 сағаттан кем емес уақыт бұрын қабылдаған кезде ешқандай өзара әрекеттесу байқалған жоқ. Сондықтан L-Тироксин 50 Берлин-Хемиді колесевелам қабылдауға дейін кем дегенде 4 сағат қалғанда қабылдау керек.
Құрамында алюминий бар антацидті препараттар, сондай-ақ құрамында темір және құрамында кальций бар препараттар
Левотироксиннің сіңуі құрамында алюминий бар антацидті дәрілерді (антацидті препараттар, сукральфат), құрамында темір бар дәрілік заттарды және құрамында кальций бар дәрілік заттарды бір мезгілде
қолданғанда төмендеуі мүмкін. Сондықтан L-Тироксин 50 Берлин-Хемиді аталған дәрілік заттарды қабылдағанға дейін кем дегенде екі сағат бұрын қабылдау керек.
Севеламер және лантан карбонаты
Севеламер және лантан карбонаты, левотироксиннің биожетімділігін төмендетуі мүмкін деп болжанады.
Пропилтиоурацил, глюкокортикоидтар және бета-блокаторлар (әсіресе пропранолол)
Аталған заттар T4-тің T3-ке айналуын басады және плазмада Т3 концентрациясының төмендеуіне әкелуі мүмкін.
Амиодарон мен йодталған рентгенконтрастылы заттар
Амиодарон мен йодталған рентгенконтрастылы заттар - йодтың жоғары құрамына байланысты гипертиреозды да, сондай-ақ гипотиреозды да туындатуы мүмкін. Болуы мүмкін бірақ диагностикаланбаған автономиясымен түйінді зобта ерекше сақтық талап етіледі. Амиодарон T4-тің T3-ке айналуын тежейді, соның нәтижесінде плазмада Т3 концентрациясының төмендеуі және ТТГ жоғарылауы туындайды. Амиодаронның қалқанша без функциясына әсер етуіне байланысты L-Тироксин 50 Берлин-Хеми препаратының дозасын түзетуге қажеттілік пайда болуы мүмкін.
Салицилаттар, дикумарол, фуросемид, клофибрат
Салицилаттар (әсіресе тәулігіне 2,0 г асатын дозаларда), дикумарол, фуросемидтің жоғары дозалары (250 мг), клофибрат, фенитоин және басқа заттар плазма ақуыздарымен байланысқан бөліктерінен левотироксинді ығыстыруы мүмкін. Бұл бос тиреоидты гормондар деңгейінің бастапқы өткінші жоғарылауына әкелуі мүмкін, соның ізінше тиреоидты гормондардың жалпы деңгейі төмендейді.
Құрамында эстроген бар контрацептивтер, постменопауза кезеңінде орын басатын гормонольді емге арналған дәрілік заттар
Құрамында эстроген бар контрацептивтерді немесе постменопаузада орын басатын гормональді емді қолдану аясында левотироксинге қажеттілік жоғарылауы мүмкін. Левотироксиннің байланысуы жоғарылауы мүмкін, бұл диагностикада және емдеуде қателіктерге ұрындыруы ықтимал.
Сертралин, хлорокин/прогуанил
Аталған заттар левотироксиннің тиімділігін төмендетеді және қан плазмасында ТТГ деңгейін жоғарылатады.
Фермент-индукциялайтын дәрілік препараттар
Барбитураттар, рифампицин, карбамазепин, фенитоин және басқа да бауыр ферменттерін белсендіруге қабілетті дәрілік заттар левотироксиннің бауыр клиренсін жоғарылатуы және оның плазмадағы деңгейінің төмендеуіне әкелуі мүмкін.
Протеаза тежегіштері
Лопинавир/ритонавирмен бір мезгілде қолданғанда левотироксиннің емдік әсерінің төмендеуі туралы хабарлар бар. Сондықтан бір мезгілде левотироксин және протеаза тежегіштерін қабылдайтын пациенттердің қалқанша без функциясына және клиникалық симптомдарына мұқият бақылау жүргізу керек.
Тирозинкиназа тежегіштері
Тирозинкиназа тежегіштері (иматиниб, сунитиниб, сорафениб, мотесаниб) левотироксиннің тиімділігін азайтуы мүмкін. Сондықтан левотироксинді және тирозинкиназа тежегіштерін бір мезгілде қабылдайтын пациенттерде қалқанша без функциясы көрсеткіштеріне және клиникалық симптом-дарына мұқият бақылау жүргізу керек. Левотироксиннің дозасын түзету қажеттілігі туындауы мүмкін.
Соя өнімдері
Соя өнімдері левотироксиннің ішекте сіңуін азайтуы мүмкін. Соя өнімдерінен тұратын диетадағы және туа біткен гипотиреозға байланысты
левотироксин қабылдайтын балалардың қан плазмасында ТТГ деңгейінің жоғарылауы туралы хабарланды. Плазмада T4 пен ТТГ қалыптағы деңгейіне қол жеткізу үшін левотироксиннің өзгеше жоғары дозалары қажет болуы мүмкін. Соя өнімдерінен тұратын диета кезінде және оны тоқтатқаннан кейін плазмада T4 пен ТТГ деңгейіне мұқият бақылау жүргізу керек; левотироксин дозасын түзету қажеттілігі туындауы мүмкін.
Арнайы ескертулер
Әйелдерде постменопауза кезеңінде остеопороздың даму қаупі жоғары; сондықтан оларға левотироксин-натрий дозасын ең төменгі тиімді дозаға жеткенге дейін таңдау (титрлеу) қажет, сондай-ақ – натрий левотироксинінің қандағы концентрациясының физиологиялық деңгейден жоғарылап кетуін болдырмау үшін – оларға қалқанша без функциясын жиі тексеру керек.
Тиреоидты гормондарды дене салмағын төмендету үшін қолдануға болмайды. Эутиреоидты алмасумен пациенттерде қалыптағы дозалар дене салмағының төмендеуіне әкелмейді. Жоғарырақ дозалары елеулі немесе тіпті өмірге қауіп төндіретін жағымсыз құбылыстардың пайда болуына әкелуі мүмкін, әсіресе дене салмағын төмендетуге арналған кейбір дәрілермен біріктірілімде.
Егер левотироксинмен емдеу режимі анықталған болса, құрамында тиреоидты гормондар бар басқа дәрілік препаратқа ауысу тек зертханалық талдаулар мен клиникалық деректерді бақылаумен жүргізілуі керек.
Левотироксинді және қалқанша безге ықпал етуі мүмкін басқа дәрілік препараттарды (мысалы, амиодарон, тирозинкиназа тежегіштері, салицилаттар және фуросемид жоғары дозаларда) бір мезгілде қабылдайтын пациенттерде қалқанша бездің функциясын бақылау қажет.
Өте сирек жағдайларда севеламер мен левотироксинді бір мезгілде қолдану аясында пайда болған гипотиреоз туралы хабарланды. Сондықтан екі препаратты да қабылдайтын пациенттерде ТТГ деңгейін мұқият бақылау ұсынылады.
Бұл препарат бір таблеткада 1 ммольден аз натрийді (23 мг) құрайды, яғни мәні «натрийсіз».
Жүктілік және лактация
Жүктілік және лактация кезінде тиреоидты гормондармен емді тоқтатпау керек. Ана мен шарананың денсаулығын барынша қамтамасыз ету үшін, қалқанша без гормондарының деңгейі қалып шегінде қалғаны маңызды. Жүктілік кезінде кеңінен қолдануға қарамастан, осы күнге дейін левотироксиннің жүктіліктің ағымына немесе шарана/жаңа туған нәрестенің денсаулығына жағымсыз әсерлері туралы деректер жоқ. Тіпті левотироксинді жоғары дозада қолданған жағдайдың өзінде емшек еметін балаларда тиреоидты гормондар емшек сүтіне гипертиреоздың дамуына немесе ТТГ сөлінісінің бәсеңдеуіне жеткілікті емес мөлшерлерде түседі.
Жүктілік кезінде эстрогеннің ықпалымен левотироксинге қажеттілік жоғарылауы мүмкін. Осы себепті жүктілік кезінде қалқанша бездің функциясын бақылау керек, ал қажет болғанда – тиреоидты гормонның дозасын түзету керек.
Тиреостатиктермен жүктілік кезінде гипертиреозды емдеуде левотироксинді адъювантты ем ретінде қолдануға болмайды.
Левотироксинді қосымша қабылдағанда тиреостатиктердің дозасын жоғарылату қажет болуы мүмкін. Левотироксиннен басқаша, тиреостатиктер әсер ететін дозада плацентарлық бөгеттен өтуі мүмкін. Бұл шаранада гипотиреозды туындатуы мүмкін. Осы себепті гипертиреозбен ауыратын жүкті әйелдерде тиреостатикалық дәрілерді әрдайым төмен дозаларда монотерапия ретінде қолдану керек.
Жүктілік және лактация кезінде қалқанша бездің супрессиясымен тест жүргізуге болмайды.
Фертильдік
Ерлер мен әйелдердің құнарлылығына зиян келтіретіні туралы зерттеулер жоқ. Ешқандай ескерту немесе нұсқаулық жоқ.
Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Көлік құралдарын басқару және механизмдермен жұмыс істеу қабілетіне зерттеулер жүргізілген жоқ.
Қолдану жөніндегі нұсқаулар
Қажет болса, таблетканы бірдей дозадағы екі бөлікке бөлуге болады.
Тиреоидты гормондармен ем/Орын басу
Дозалау режимі
Дозалау жөніндегі нұсқаулар нұсқаулық талаптарына сәйкес қарастырылады. Жекелей тәуліктік доза зертханалық диагностиканың және клиникалық тексерудің нәтижелері бойынша анықталады.
Егер қалқанша бездің қалдық функциясы сақталса, орын басу емі үшін төменірек дозасы жеткілікті болуы мүмкін.
Егде жастағы пациенттерде, жүректің ишемиялық ауруларымен және ауыр немесе созылмалы гипотиреозбен пациенттерде тиреоидты гормондармен емді айрықша сақтықпен бастау керек – мысалы, емді төменірек дозадан бастау және тиреоидты гормондар деңгейін жиі тексеріп, айтарлықтай аралықпен баяу жоғарылату ұсынылады. Тәжірибеге сәйкес дене салмағы төмен пациенттерде, сондай-ақ ірі түйінді зобпен пациенттерде, препараттың төменірек дозасы жеткілікті болады.
T4 немесе fT4 деңгейі кейбір пациенттерде жоғары болуы мүмкіндігіне байланысты, емдеу режимін бақылау үшін ең дұрысы қан сарысуында ТТГ концентрациясын анықтау керек.
Қолданылуы Дозасы
(тәулігіне - натрий левотироксині микрограмы)
Гипотиреоз
Ересектер
( 2 - 4 апта аралықпен 25 - 50 мкг жоғарылату)
Алдымен
Содан кейін
25 50
100 200
Зобтың қайталануының профилактикасы 75 200
Эутиреоидты қатерсіз зоб 75 200
Гипертиреозда тиреостатикалық емді жүргізу аясында адъювантты ем: 50 100
Қалқанша бездің қатерлі жаңа түзілімі себебінен тиреоидэктомиядан кейін: 150 300
Пациенттердің ерекше топтары
Егде жастағы пациенттерде дозалануы
Кейбір жағдайларда егде жастағы пациенттерде, мысалы жүрек ауруларымен пациенттерде ТТГ деңгейін мезгіл-мезгіл анықтаумен, натрий левотироксині дозасын біртіндеп төмендетуді таңдау керек.
Балалар мен жасөспірімдер
Туа біткен және жүре пайда болған гипотиреозбен демеуші доза, әдетте, тәулігіне дене беткейінің м2 ауданына 100 -150 мкг левотироксинді құрайды.
Дереу левотироксинмен орын басу қажет болатын туа біткен гипотиреозбен жаңа туғандар мен нәрестелер үшін алғашқы 3 айда қолдануға арналған натрий левотироксинінің ұсынылған бастапқы дозасы тәулігіне дене салмағына 10 - 15 мкг құрайды. Кейіннен дозаны клиникалық деректерге, сондай-ақ тиреоидты гормондар мен ТТГ деңгейіне қарай жекелей түзету керек.
Жүре пайда болған гипотиреозы бар балалар үшін левотироксиннің ұсынылған бастапқы дозасы тәулігіне 12,5 - 50 мкг құрайды. Клиникалық деректерге, сондай-ақ тиреоидты гормондар мен ТТГ деңгейіне сүйеніп, дозаны біртіндеп, 2 - 4 апта аралықпен, орын басу емі үшін қажет толық дозаға қол жеткенше жоғарылату керек.
Қолдану тәсілі
Толық тәуліктік дозасын аш қарынға ішке, сұйықтықпен ішіп қабылдайды; препаратты кем дегенде таңғы астан жарты сағат бұрын ертеңгісін қабылдайды.
Нәрестелерге толық тәуліктік дозаны сол күні бірінші рет ас ішуге дейін кем дегенде жарты сағат бұрын береді. Таблеткаларды суспензия түрінде де қабылдауға болады.Таблеткаларды алдын ала судың аздаған мөлшерінде (10 – 15 мл) еріту керек, ал тек жаңадан дайындалу тиіс алынған суспензияны оған сұйықтықтың аздаған мөлшерін (5 – 10 мл) қосып, балаға беру керек.
Қолдану ұзақтығы
Гипотиреозда және қалқанша бездің қатерлі жаңа түзілімі себебінен тиреоидэктомиядан кейін – әдетте, өмір бойы; Эутиреоидты зобта және зобтың қайталануының профилактикасы үшін – бірнеше айдан немесе жылдан өмір бойы қолдануға дейін;
Гипертиреозда адъювантты емде – тиреостатикалық емнің ұзақтығына байланысты.
Эутиреоидты зобтың емдеу ұзақтығы 6 айдан екі жылға дейінді құрауы керек. Егер осы уақытта L-Тироксин 50 препаратымен емдеу күтілген нәтижеге жеткізбесе, емнің басқа нұсқаларын қарастыру керек.
Артық дозаланғанда қабылданатын шаралар
Артық дозалану көрсеткіші ретінде T4 немесе сT4 деңгейінің жоғарылауына қарағанда T3 деңгейінің жоғарылауы нақтырақ болады.
Симптомдары
Артық дозаланған және уыттанған жағдайда метаболизмнің орташа немесе айтарлықтай жеделдетілуіне тән белгілер пайда болады. Артық дозалану дәрежесіне байланысты препарат қабылдауды тоқтату және бақылау тексерілуінен өту ұсынылады.
Адамда уыттану жағдайында (суицидке талпыну) 10 мг дозада левотироксин асқынусыз өтеді. Егер анамнезінде жүректің ишемиялық ауруы болмаған жағдайда, өмірлік маңызды функцияларының (тыныс алу мен қан айналымы) бұзылуы секілді елеулі асқынулардың даму мүмкіндігі төмен. Осыған қарамастан, тиреоуытты криз, жүрек жеткіліксіздігі және команың дамуы туралы хабарлар бар.
Анамнезінде левотироксинді бірнеше жыл шамадан тыс қабылдаған жағдайда пациенттерде кенеттен жүректен болған өлім жағдайы туралы жекелеген хабарламалар бар.
Емі
Жедел артық дозаланған жағдайда препараттың асқазан-ішек жолынан сіңірілуін белсендірілген көмірді қабылдау көмегімен азайтуға болады. Ем әдетте симптоматикалық және демеуші сипатқа ие. Ауыр бета-симпатомиметикалық симптомдарды, мысалы тахикардияны, үрейленуді, қозуды немесе гиперкинезияны бета-блокаторларды қолдану арқылы азайтуға болады. Тиреостатиктерді қолдануға болмайды, өйткені қалқанша бездің функциясы толығымен бәсеңдетілген.
Препаратты өте жоғары дозада (суицидке талпыну) қабылдаған жағдайда плазмаферез жүргізген жөн.
Левотироксин артық дозаланғанда ұзақ уақыт бақылауға алу керек. Левотироксиннің лиотиронинге біртіндеп айналуына байланысты симптомдардың дамуы 6 күнге дейін кідірумен жүруі мүмкін.
Дәрілік препаратты қолдану бойынша сұрақтар туындаған кезде медицина қызметкерінен кеңес алу қажет.
ДП стандартты қолданған кезде байқалатын жағымсыз реакциялар-дың сипаттамасы және осы жағдайда қабылдауға тиісті шаралар (қажет болған жағдайда)
Өте жиі
- жүрек соғысының жиілеуі
- ұйқысыздық
- бас ауыру
Жиі
- тахикардия
- ашушаңдық
Сирек
- идиопатиялық бассүйекішілік гипертензия (әсіресе балаларда)
Белгісіз (қолда бар деректер негізінде жиілігін бағалауға келмейді)
- аритмия, стенокардия
- аса жоғары сезімталдық
- бөртпе, есекжем, гипергидроз
- мазасыздану жай-күйі
- бұлшықет әлсіздігі және бұлшықет құрысулары, левотироксиннің бәсеңдетуші дозалары аясындағы остеопороз, әсіресе постменопауза кезеңінде әйелдерде, көбінесе ұзақ емдеу кезінде
- туған кездегі дене салмағы өте төмен шала туған нәрестелерде қан кернеулері, коллапс (жедел тамыр жеткіліксіздігі)
- етеккір оралымының бұзылуы
- диарея, құсу
- салмақтың азаюы
- тремор
- ыстыққа шыдай алмау, қызба
Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаны қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет
Қазақстан Республикасы Денсаулық сақтау министрлігі Медициналық және фармацевтикалық бақылау комитетінің «Дәрілік заттар мен медициналық бұйымдарды ұлттық сараптау орталығы» ШЖҚ РМК
Қосымша мәліметтер
Дәрілік препараттың құрамы
Бір таблетканың құрамында
белсенді зат - 50 мкг натрий левотироксині
қосымша заттар – микрокристалды целлюлоза, кальций гидрофосфат дигидраты, натрий крахмалы гликоляты (А типі), декстрин, ұзын тізбекті ішінара глицеридтер.
Сыртқы түрінің иісінің, дәмінің сипаттамасы
Ақ дерлік түстен аздап сарғыш түске дейінгі (түсі бойынша RAL 9001 сәйкес ақсары түстен қанық емес), бір жағында сызығы және екінші жағында «50» деген мөрі бар, сәл дөңес, дөңгелек пішінді таблеткалар.
Шығарылу түрі және қаптамасы
25 таблеткадан ламинацияланған алюминий фольгадан (полиамид/ алюминий/поливинилхлорид) және қатты алюминий фольгадан жасалған пішінді ұяшықты қаптамаға салынған.
1, 2 немесе 4 пішінді қаптамадан медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынған.
Жарамдылық мерзімі
2 жыл
Жарамдылық мерзімі өткеннен кейін қолдануға болмайды.
Сақтау шарттары
25° С-ден аспайтын температурада. Балалардың қолы жетпейтін жерде сақтау керек!
Дәріханалардан босатылу шарттары
Рецепт арқылы
Өндіруші туралы мәлімет
Берлин-Хеми АГ (Менарини Групп)
Глиникер Вег 125
12489 Берлин
тел.: +49 30 6707-0
факс: +49 30 6707-212-0
Электронды пошта: info@berlin-chemie.de
Тіркеу куәлігінің ұстаушысы
Берлин - Хеми АГ (Менарини Групп),
Глиникер Вег 125, 12489 Берлин,
Германия
тел.: +49 30 6707-0
факс: +49 30 6707-212-0
Электронды пошта: info@berlin-chemie.de
Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)
«Berlin-Chemie/A.Menarini Distribution Kazakhstan ЖШС
(Берлин-Хеми/А.Менарини Дистрибьюшн Казахстан)
050051, Алматы қ., Луганский к-сі 54, коттедж № 2
Телефон нөмірі:+7 727 2446183, 2446184, 2446185
Факс нөмірі: +7 727 2446180
Электронды пошта: Kazakhstan@berlin-chemie.com
